„ოსები ამბობენ, რომ ტატუნაშვილი გულის უკმარისობით გარდაიცვალა“
ვახტანგ ყოლბაია: „ფაროსანა სოჭიდან და კრასნოდარიდან გადმოვიდა საქართველოში“
ინტერვიუ აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელ ვახტანგ ყოლბაიასთან.
-ბატონო ვახტანგ, განცხადება იყო, რომ ჟენევაში შეხვედრის დროს რუსებმა კატეგორიულად უარყვეს ტატუნაშვილის მკვლელობასთან მათი კავშირი. ძალიან ცუდი რეაქციები ჰქონდათ, როცა ტატუნაშვილის მკვლელობაზე ბრალდება მათი მისამართით აშკარად გაისმა, კონკრეტულად, რაში გამოიხატა მათი რეაქცია?
-მე ვარ ჟენევის მოლაპარაკებებში მონაწილე ჯგუფის რიგითი წევრი. ამ ჯგუფის სხდომაზე ჯგუფის ხელმძღვანელის თანათავმჯდომარემ, ეუთოს წარმომადგენელმა განაცხადა, თუ რა ტრაგიკული შემთხვევა მოხდა სამაჩაბლოში. ამას მოჰყვა მსჯელობა. ოსურმა მხარემ განაცხადა, ჩვენ არაფერ შუაში ვართ, გულით გარდაიცვალაო. ამას მოჰყვა ჩვენი რეაქცია. როცა ითქვა, პრაქტიკულად, დამტკიცებულია, რომ ტატუნაშვილი ნაწამებია, დაშავებულია, მათ, ცხადია, ყველაფერი იუარეს.
ჩვენ განვაცხადეთ, რომ პასუხისმგებლობა რუსულ მხარეს ეკისრება, რომელიც, ფაქტობრივად, განაგებს ცხინვალის რეგიონში ყველაფერს. მისი გავლენა უდავო და შეუვალია, რუსეთის მხარეს ეკისრება პასუხისმგებლობა იქ მომხდარ ყველა ფაქტზე. მათ შორის, არჩილ ტატუნაშვილის ვერაგულ, ტრაგიკულ მკვლელობაზე. ჩვენმა თანამომხსენებელმა მაგალითად მოიყვანა ბაშარულის დაღუპვის საქმე, რომელიც ადრე დაკარგული იყო და გარკვეული პერიოდის შემდეგ დაღუპული იპოვეს.
ოსური მხარე აცხადებდა, რომ ბაშარულზე არაფერი სმენიათ. არადა, ე. წ. მილიციის ოთახში შეიყვანეს და იქიდან პიროვნება გაქრა. ამ დროიდან 1 კვირის შემდეგ, გარდაცვლილი იპოვეს.
ასეთი განცხადებები მათ არ სიამოვნებდათ და კატეგორიულად იუარეს, ჩვენ რა შუაში ვართ, თქვენ არაკონსტრუქციულად იქცევით, თქვენი განცხადებები აბსოლუტურად აზრს მოკლებულიაო. ეს იყო და ეს.
-საერთოდ, უარყოფენ რუსები, რომ ცხინვალის რეგიონზე კონტროლს თვითონ ახორციელებენ?
-რა თქმა უნდა. რუსები ამბობენ, რომ ეს არის „დამოუკიდებელი ქვეყანა“, „სახელმწიფო“ და ჩვენ არაფერ შუაში ვართო. რუსები ამბობენ, რომ ცხინვალის რეგიონში ე.წ. სამხრეთ ოსეთის „ლეგიტიმური ხელისუფლება“ ახორციელებს ადმინისტრაციულ კონტროლს, თითქოს ოსები ახორციელებენ ე.წ. საზღვარზე კონტროლს. თითქოს თვითონ მამა აბრამის ბატკნები არიან და არაფერ შუაში არ არიან.
-რუსებს დოკუმენტები რომ აქვთ გაფორმებული ცხინვალის ოსურ საოკუპაციო რეჟიმთან?
-რა დოკუმენტებიც აქვთ, ეს არის ვითომ დამოუკიდებელ „სამხრეთ ოსეთსა“ და რუსეთის ფედერაციას შორის, ვითომდა საერთაშორისო ხელშეკრულება აქვთ გაფორმებული, რასაც ჩვენ არ ვცნობთ.
-ოსური სტრუქტურების პირდაპირ დაქვემდებარებაზე არ არის საუბარი? ცნობილია, რომ ისინი რუსებს პირდაპირ ექვემდებარებიან.
-პირადპირი დაქვემდებარება ცნობილია. ეს აფხაზეთშიც ასეა, მაგრამ ეს გაფორმებული აქვთ, როგორც შეთანხმება. ჩვენ მათ „დოკუმენტებს“ ყურადღებას არ ვაქცევთ და არც ვცნობთ. ჩვენთვის მიუღებელია მათი შეთანხმებები. ჩვენთვის მიუღებელია მათი შეთანხმებების დოკუმენტებად ცნობა. მათ დოკუმენტებზე საერთაშორისო სამართლით აპელირება ნიშნავს მსჯელობაში შესვლას, კარგია ეს „დოკუმენტი“ თუ არა, რაც იმის მაჩვენებელი იქნება, რომ ამ დოკუმენტის არსებობა ირიბად გაწუხებს. ამიტომ არსებით განხილვაში არ შევდივართ, თუ რა „დოკუმენტზეა“ საუბარი.
-ოსები იგივეს იმეორებენ, რასაც რუსები?
-ოსები ვერ ეტყვიან რუსებს, რომ რუსები რაიმე ბრალში არიან. მაშინვე გამოჩნდება მათი ე.წ. სახელმწიფოებრიობის მტკიცების კრახი. ამავდროულად, ისინი არ აღიარებენ, რომ რაიმე დანაშაული აქვთ ჩადენილი. კონკრეტულ შემთხვევასთან დაკავშირებით თქვეს, რომ ტატუნაშვილი გულის უკმარისობით გარდაიცვალა. ისიც ითქვა, კომისიაა შექმნილი და გამოძიება მიმდინარეობს. ჩვენ მიერ მოძიებული დოკუმენტები ქართულ მხარეს გადავეცითო.
-ოთხოზორიას მკვლელობას რით ამართლებენ? ოთხოზორიაზეც ხომ ვერ იტყვიან, გულის უკმარისობით დაიღუპაო. მისი მკვლელობის დოკუმენტი არსებობს.
-ოთხოზორის მკვლელობა სხვა შემთხვევაა. ოთხოზორიას კანჯიოღლუ შემოჰყვა და პირდაპირ ესროლა. აქ სხვა მდგომარეობასთან გვაქვს საქმე. ოთხოზორიას მკვლელობაზე ვიდეოფირიც არსებობს და მოწმეებიც.
-ბოლო დროს რუსეთის წარმომადგენელმა განაცხადა, რომ ფაროსანას შემოსევა შეიძლება ბიოლოგიური დივერსიის შედეგი იყოს, რადგან საქართველოში ბიოლოგიური ლაბორატორია არსებობსო.
-ადრე ბიოლოგიურ დივერსიაზე ცხინვალის წარმომადგენელი საუბრობდა და ამასთან დაკავშირებით შესაბამის პასუხს ღებულობდა. ახლა რუსეთმაც მიმართა იგივე მეთოდოლოგიას.
-ამაზე ჟენევაში ხომ არ ყოფილა საუბარი?
-სხვათა შორის, ამის შესახებ ჟენევაში არ უთქვამთ, ინფორმაცია შემდეგ გაჩნდა. არადა, აბსოლუტურად ალოგიკური ბრალდებაა, რადგან ფაროსანა შემოვიდა აფხაზეთიდან, სოჭიდან, კრასნოდარის მხარიდან და მერე გადმოვიდა აქეთ ზუგდიდში. როგორც იტყვიან, ფიცი მწამს, ბოლო მაკვირვებსო. ეს უბედურება მათგან წამოვიდა და თბილისი რა შუაშია, მაგრამ რაღაცით ხომ უნდა გაამართლონ თავისი უმოქმედობა.
რეალობიდან გამომდინარე, ქმედითი დახმარებაც კი არ შეუძლიათ იმიტომ, რომ ამას ფინანსები და ადამიანური რესურსები სჭირდება. მათთვის ფაროსანასთან ბრძოლა პრიორიტეტული არ არის. აფხაზებს აკმაყოფილებენ იმით, რასაც აძლევენ. ამიტომ უსუსური რაღაცები თქვეს. მათი განცხადება არასერიოზულია. ჩვენ ეს არასერიოზულად მივიჩნიეთ.
-პირიქით, თვითონ რუსებმა ხომ არ მოაწყვეს ბიოლოგიური დივერსია?
-აგაშენათ ღმერთმა. ჩვენ ეს დავაფიქსირეთ არა ნიშნის მოგების მიზნით. ოლიმპიური თამაშების დროს გადმოვიდა ის მწერი, რამაც დააზიანა კოლხური ბზა. შემდეგ, როცა ფაროსანაზე იყო საუბარი, ჩვენ დავადგინეთ და ვთქვით, რომ ფაროსანა კრასნოდარის მხრიდან გადმოვიდა. ფაროსანა არ არის დღევანდელი პრობლენა, სხვა ქვეყნებშიც არის. ოლიმპიური თამაშები რომ ჰქონდათ, მაშინ ფაროსანა სოჭიდან და კრასნოდარის მხარიდან წამოვიდა აქეთ და ასე აღმოჩნდა აფხაზეთის ტერიტორიაზე. იქ პალმის გამანადგურებელი მავნებელიც არის, რომელიც ასევე რუსეთიდან გადმოვიდა. ე.ი. სხვადასხვა სახის მავნებლები რუსეთის ფედერაციის ტერიტორიიდან მოდიან.
„ახალი თაობა“
გულიკო ბალაძე