უახლესი ამბები

ოთარ დანელიას მინსკში ვიზიტისას ალექსანდრე ლუკაშენკოს საქართველოში ჩამოსვლის საკითხი განიხილეს

03 02 2015 | ავტორი: admin
ოთარ დანელიას მინსკში ვიზიტისას ალექსანდრე ლუკაშენკოს საქართველოში ჩამოსვლის საკითხი განიხილეს
გარესამყარო
0

მინსკში, საქართველო-ბელორუსის სამთავრობათაშორისო კომისიის სხდომაზე საქართველოში ბელორუსის პრეზიდენტის ალექსანდრე ლუკაშენკოს ვიზიტთან დაკავშირებული საკითხები განიხილეს.

როგორც “ინტერპრესნიუსს” სოფლის მეურნეობის სამინისტროდან აცნობეს, მინსკში ორმხრივი ეკონომიკური თანამშრომლობის სამთავრობათაშორისო კომისიის სხდომა ოთხწლიანი პაუზის შემდეგ გაიმართა. სხდომაზე ორ ქვეყანას შორის სავაჭრო-ეკონომიკური თანამშრომლობის მდგომარეობა და პერსპექტივები განიხილეს. აღინიშნა, რომ წინა წლებთან შედარებით პოზიტიური დინამიკა შეიმჩნევა და ტვირთბრუნვა გაზრდილია.

როგორც ბელორუსის რესპუბლიკის სოფლის მეურნეობისა და სურსათის მინისტრმა ლეონიდ ზაიაცმა განაცხადა, ორმხრივი სამთავრობათაშორისი შეხვედრა კიდევ უფრო მნიშვნელოვანია იმ ფონზე, როდესაც საქართველოში ბელორუსის რესპუბლიკის პრეზიდენტის ალექსანდრე ლუკაშენკოს ვიზიტი აპრილში იგეგმება.
“ჩვენი შეხვედრა ერთგვარი წინამოსამზადებელი ხასიათისაა”, – განაცხადა ლეონიდ ზაიაციმ.

საქართველოს სოფლის მეურნეობის მინისტრმა ოთარ დანელიამ, თავის მხრივ, ორ ქვეყანას შორის მჭიდრო ეკონომიკური და მეგობრული ურთიერთობების გაღრმავების პოტენციალზე გაამახვილა ყურადღება. მისი თქმით, მნიშვნელოვანია, რომ ოთხწლიანი პაუზის შემდეგ ორი ქვეყნის მთავრობის ეკონომიკური მიმართულების წარმომადგენლებს საშუალება ეძლევათ კონკრეტული გადაწყვეტილებები მიიღონ. სხდომაზე აღინიშნა, რომ სავაჭრო ურთიერთობების გაღრმავების კუთხით, მნიშვნელოვანი იყო ნოემბერში მინსკში გამართული საერთაშორისო გამოფენა, სადაც საქართველოს სოფლის მეურნეობის სამინისტროს მხარდაჭერით, ქართულ კომპანიებს პირველად მიეცათ საშუალება საკუთარი პროდუქციის პოპულარიზაცია ბელორუსში მოეხდინათ.

შეხვედრაზე გადაწყდა, რომ საქართველოში გაიხსნება ბელორუსის სავაჭრო წარმომადგენლობა, რომელიც ბელორუსის რესპუბლიკაში წარმოებული პროდუქციის ცნობადობის ამაღლებას უზრუნველყოფს. ვიზიტის ფარგლებში მხარეებმა ორ ქვეყანას შორის სასოფლო-სამეურნეო მიმართულებით სამეცნიერო-კვლევით ცენტრებს შორის თანამშრომლობის პერსპექტივებიც განიხილეს.

მხარეებმა ხელი მოაწერეს ოქმს, რომლის თანახმადაც გაააქტიურდება თანამშრომლობა შემდეგი მიმართულებებით: თევზჭერა, მეცხოველეობა, კომბინირებული საკვების, ხორცისა და რძის პროდუქტების წარმოება.

საქართველოს სამთავრობო დელეგაციის შემადგენლობაში იყვნენ: დელეგაციის ხელმძღვანელი, საქართველოს სოფლის მეურნეობის მინისტრი ოთარ დანელია, მინისტრის პირველი მოადგილე ნოდარ კერესელიძე, მინისტრის მოადგილე იური ნოზაძე, ეკონომიკისა და მდგრადი განვითარების მინისტრის მოადგილე მიხეილ ჯანელიძე, საგარეო საქმეთა მინისტრის მოადგილე დავით ჯალაღანია, მთავრობის ეკონომიკური მიმართულების სხვა სამინისტროების წარმომადგენლები და საქართველოს საგანგებო და სრულუფლებიანი ელჩი ბელორუსის რესპუბლიკაში დავით კოტარია.

წყარო: „ინტერპრესნიუსი“